ភ្នំពេញ៖ អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ (CAMSOC) បានប្តេជ្ញាចិត្តខ្ពស់ក្នុងការផ្សព្វផ្សាយ «គុនខ្មែរ» ជាកីឡាអត្តសញ្ញាណជាតិទៅកាន់ពិភពលោកឲ្យកាន់តែផុសផុលបន្ថែមទៀត។
ក្នុងកិច្ចប្រជុំពីការដាក់កីឡាគុនខ្មែរ ក្នុងព្រឹត្តិការណ៍កីឡាស៊ីហ្គេម លើកទី៣២ នាព្រឹកថ្ងៃទី២៦ ខែមករានេះ អគ្គលេខាធិការ CAMSOC លោក វ៉ាត់ ចំរើន ក៏បានបន្ថែមវិញ្ញាសាសម្តែងមួយទៀតនោះគឺវិញ្ញាសា គុនគ្រូ ដែលមានការចូលរួមគាំទ្រពីបណ្តាប្រទេសទាំង៧ ដែលចូលរួមប្រកួត។
អគ្គលេខាធិការបានឱ្យដឹងថា ដើម្បីលើកទឹកចិត្តកីឡាគុនខ្មែរដែលជាវប្បធម៌ អរិយធម៌របស់ខ្មែរដ៏ផូរផង់ និងកីឡាអត្តសញ្ញាណបុព្វបុរសជាតិ កម្ពុជាបានបញ្ចូលវិញ្ញាសាសម្តែង ដែលហៅថា «គុនគ្រូ» ដែលជាសិល្បៈមួយរក្សាប្រពៃណីទំនៀមទំលាប់ និងថែរក្សានូវអត្តសញ្ញាណជាតិខ្មែរ។ ក្បាច់គុនខ្មែរមានសិល្បៈ យុទ្ធគុន យុទ្ធសាស្រ្ត និងយុទ្ធវិធី ដែលទាំងនេះគឺជាសិល្បៈកីឡាមួយ។
លោកបានឱ្យដឹងថា ការដាក់បញ្ចូលវិញ្ញាសាគុនគ្រូនេះ ប្រទេសទាំងអស់បានឯកភាពគ្នា គាំទ្រយកទៅហ្វឹកហាត់តាមការណែនាំរបស់កម្ពុជា ដើម្បីមកប្រកួតនៅស៊ីហ្គេម។
ជាមួយគ្នានេះដែរ លោកបានកំណត់របៀបតុបតែងខ្លួនសម្រាប់កីឡាប្រដាល់គុនខ្មែរ ដើម្បីបញ្ជាក់ពីអត្តសញ្ញាណខ្មែរ គឺប្រើក្រមា និងទង់ជាតិជាឆ្នួតក្បាល និង តម្រូវឱ្យប្រទេសដែលចូលរួមប្រកួតគុនខ្មែរ ប្រើក្រមាដូចគ្នា តែដាក់ទង់ជាតិរបស់ប្រទេសខ្លួនបាន ក្នុងព្រឹត្តិការណ៍ស៊ីហ្គេមឆ្នាំ២០២៣ នេះ។
គួរឱ្យដឹងដែរថា មកដល់ពេលនេះមានប្រទេសក្នុងតំបន់អាស៊ានចំនួន ៧ប្រទេសរួមទាំងកម្ពុជា ចូលរួមប្រកួតវិញ្ញាសាគុនខ្មែរ នៅក្នុងព្រឹត្តិការណ៍ស៊ីហ្គេមលើកទី៣២ នៅកម្ពុជា៕